سورج چن ستارے روون

سورج چن ستارے روون
توں روویں تے سارے روون

تارا لیکھ دا عرشوں ٹُٹیا
لوکی تخت ہزارے روون

ساڈے گھر دی خواہش مر گئی
ساڈے دل دے تارے روون

شوہ کھاوے دریا وچ گوتے
دوروں ویکھ کنارے روون

حق مٹاون خاطر جیہڑے
بھخدے رہے انگیارے روون

قسمت دی دہلیز تے بہہ کے
قسمت دے دُھتکارے روون

جے کر پیسہ خوشیاں ونڈے
کاہتوں راج دُلارے روون

اک دوجے دے عملاں وَلّے
ویکھ کے ایتھے سارے روون

مینوں روندا ویکھ صغؔیرا
ادھی راتیں تارے روون