روہی وچ کھلوتے رُکھ نوں وڈّھن دا
تینوں پورا حق اے مینوں چھڈّن دا
میر ے ول نہ ویکھ نصیباں والڑیے
فیدہ کیہ اے تھل وچ کنکاں گڈّن دا
ہنجو روک کے ہاسے بنھ لے پلکاں تے
کجھ نہیں لبھنا ایتھوں ہنجو کڈّھن دا
اوہنے ہر اک موڑ تے مینوں چھڈیا سی
مینوں وَل نہیں آیا اوہنوں چھڈّن دا
جہنے دُوروں ویکھ کے بُوہا بھیڑ لیا
مُل کیہ پَینا اوتھے جھولی اَڈّن دا
حوالہ: اک خیال سمندروں ڈونگھا، صغیر تبسم؛ پرنٹ میڈیا پبلی کیشنز لاہور 2022؛ صفحہ 16 ( ویکھو )
