بُھل گیاں بانہواں بھرن کلاوے

ساہ سینے وچ پھس پھس جاوے
ہُن محرم آوے نہ آوے
ریتا ہو گئے انگ نتانے
بُھل گیاں بانہواں بھرن کلاوے

ساری سکدیاں گئی جوانی
رو رو رہیا نہ اکھیں پانی
چاہت اجے وی اونتر جانی
وڈھ وڈھ کھاندی اے تے کھاوے
ہُن محرم آوے نہ آوے

سینے پیڑ ودھیری ہو گئی
جس تھاں ڈِگ پئی ڈھیری ہو گئی
آکھوس یار بہتیری ہو گئی
ہُن کوئی لارا نواں نہ لاوے
ہُن محرم آوے نہ آوے

نین گئے ترلے کردی اے
نہ وڑیا ویہڑے بردی اے
ہُن لکھ واری منہ مردی اے
اک پانی دی چِھٹ نہ پاوے
ہُن محرم آوے نہ آوے

جو وی غم اُس دِتا سہہ گئے
محل آساں دے ڈھیندے ڈھیہ گئے
اک دو ساہ گنتی دے رہ گئے
ہُن ساڈے تے ترس نہ کھاوے
ہُن محرم آوے نہ آوے
ریتا ہو گئے انگ نتانے

بُھل گیاں بانہواں بھرن کلاوے
ہُن محرم آوے نہ آوے