پیار تیرے سنگ ہور ودھا کے ویکھ لواں گا
سِر نوں تلیاں اُتے چا کے ویکھ لواں گا
بیلے دی مزدوری چوری ویکھ لئی اے
کھیڑے دے سنگ آڈھا لا کے ویکھ لواں گا
بستی دے وچ گھر گھر کیدوں کھیڑا وسے
چوری چُھپے تینوں آ کے ویکھ لواں گا
مدتاں ہوئیاں جے اک واری آ جاویں تے
اُجڑی محفل پھیر سجا کے ویکھ لواں گا
بھیڑ پوے نیڑے کوئی نہ آ کے ڈھکدا
بھجیاں باہواں گل نوں لا کے ویکھ لواں گا
تیری خاطر دِل دے کورے کاغذ اُتے
تیری اک تصویر بنا کے ویکھ لواں گا
صدف جے میرے اشک دی قدر نہ پائی توں
پھیر میں تینوں غزل سنا کے ویکھ لواں گا
