گھوڑا

کسی زین تے لانگڑ کھچیا
پیر رکاب دے اندر رکھیا
راساں نپیاں
اڈی ماری
گھوڑا ٹریا
پوند اسوار دے آکھے لگیا
پر فیر اوس وی یال دے اندر
سم دے اندر
پنڈے دے ہر وال دے اندر
ہور اک گھوڑے اکھیاں پٹیاں
ناس پھلائی

پونچھل دی تلوار بنائی
بلماں وانگ کنوتی لشکی
اڑھب ہویا
فیر مار پچھنڈا الف ہویا
فیر ٹاپاں دی کھڑکار ہوئی
تے پینڈے اوس نوں
رستہ دیندے پِچھے ہٹے
گھوڑے اپنا رنگ وکھایا
آپی رستہ، آپی پینڈا
آپی اوہ اسوار کہوایا

میرے ول وی ویکھو ، سجنو،
گھوڑے دی کنپٹی نال میں نتھی ہویا
رگڑا کھاندا،
گٹے گوڈے سبھ تڑواوندا
گھٹے دے وچ رُلدا جاواں
میں کس دا اسوار کہواواں؟