اصلی گل اے کسے دے نال کھلوون تیرا
میرے نال نہ سہی، عشق وچہ ہوون تیرا
اندر باہر تریلی جہی کیوں آجاندی اے
کیہ شے ہے نظراں دے نال چھوہون تیرا
کُجھ میرا وی حصہ رکھ لیا کر سوہنیے
کدھر جاندا اے پیراں دا دھوون تیرا
کھکھڑ کھیہا اے سجناں یا فر کھیڈ اے کوئی
اک سُفنے نوں دوجے نال پروون تیرا
چل کسے کارے تاں لیانداعشق نے تینوں
چنگا لگیا کسے بھار دا ڈھوون تیرا
دنداں تے اکّھاں دا پندھ نئیں ہُندا کوئی
ہسّدیاں ہسّدیاں نکل گیا جے روون تیرا
جیہڑے مال دی اُکّا لوڑ ای نئیں سی تینوں
سمجھ نہ آیا جھاٹ مار کے کھوہون تیرا
گھاٹے وادھے ول وی دھیان دیا کر کوئی
سیکن لگیاں ساڑ ای دِتّا اے اوون تیرا
لَیہہ کے ڈگ پینی ایں ظفر تندوری اندر
کیہڑے لیکھے اس روٹی نوں موون تیرا
