عجیب رت اے

عجیب رت اے بہار وچ وی اداس بوٹے
اداس لگراں
بے رنگ شاماں بے نور فجراں
بہار دے پھل خزاں دے آون دی خبر سن کے ای
جھڑ گئے نیں
نوخیز غنچے وی پھل بنن نوں بوہت پہلاں ای سڑ گئے نیں
غریب لوکاں دے بال بچے ایہ مار ورت چوں
نکل توں پہلاں ایں ماپیاں تو وچھڑ گئے نیں
جوان اکھیاں دے خوابی حلیے کسے شکل وچ ڈھلن توں پہلاں ای
بگڑ گئے نیں
محبتاں دے وکیل سارے بناں دلیلوں
ای ہر گئے نیں
تے دو دلاں دے پیمان وعدے سلیٹ دل توں اُتر گئے نیں

عجیب رت اے
سمے دی چھاتی تے بہہ کے میں جو فریب رت چوں یقین لبھناں
کسے دے دتے میں مان وچوں پتہ نہیں کاہنوں توہین لبھناں
پرائے جسماں دی دُھوڑ وچوں
وچھوڑیاں دا سراب لے کے
اجے وی دل دے مکین لبھناں
جفا اگا کے وفا وڈیچاں میں ٹھیکے ایسی
زمین لبھناں
بغیر لفظاں سوال ہووے
بغیر جواب ہووے میں اوہ نگاہواں چ جین لبھناں
پتہ نہیں کاہنوں
کتاب دل دی میں بند رکھ کے تے جھوٹے وعظاں چوں
دین لبھناں

عجیب رت اے
بساط توں ودھ بھار چک کے وی مطمئن نیں وچارے لوکیں
بے نور اکھاں چ موئے خواباں دے لاشے ڈھونڈے
نکارے لوکیں

وفا دے موتی کراہاں گلیاں چ رلدے ویکھاں تے
دکھ نہیں ہوندا
سماناں ول جو دعا میں گھلاں اوہ عرش تیکر نہ پہنچ پائے
تے دکھ نہیں ہوندا
اخیری منزل اے بے حسی دی کِسے دے متھے تے سُکھ
جے ویکھاں تے سکھ نہیں ہوندا
کسے دی جھولی چ دُکھ ویکھاں تے دکھ نہیں ہوندا
عجیب رت اے