نویں خیالاں ورگے سن

نویں خیالاں ورگے سن
لوک مشالاں ورگے سن

بال سیانے سن ساڈے
بڈھڑے بالاں ورگے سن

پُتر دُھپاں توں بھیڑے
پیو ترپالاں ورگے سن

روڑھ کے لے گئے سبھو کجھ
اتھرو جھالاں ورگے سن

برچھیاں ورگے ہتھ سن اوہ
سینے ڈھالاں ورگے سن

رات چھماہی پیندی سی
دینہہ وی سالاں ورگے سن

چِکڑ آب حیاتی سی
روڑے لالاں ورگے سن

راتاں دا تے کیہ پُچھنا
دن ترکالاں ورگے سن

اوہناں دے وی حال ظفر
ساڈیاں حالاں ورگے سن