پتھر ورگے لوکاں دے وچ کی مسکاوے

پتھر ورگے لوکاں دے وچ کی مسکاوے
کچّ دی گڈی کرچی کرچی ہُندی جاوے

اوہدے ہاسے وچوں ستے رنگ گواچے
کیہڑا امبر اُتے جا کے پینگھ ہلاوے

اوہدیاں زلفاں دے سنگ کھہِہ کے جھلی ہوئی
مست ہوا وی راہواں دے وچ گِدھا پاوے

الڑ گوری اکلاپے وچ چوری چوری
شیشے ساہویں ویکھ کے اپنا مکھّ شرماوے

ویلے نے کس نیہرے کھوہ وچ تاڑیا مینوں
اکھاں نوں رنگ بھلّ گئے نے سوہنے تے ساوے

سونے دے پنجرے وی پنچھی خُش نہیں رہندا
بھاویں کوئی کوہقافاں چوں چکّ لیاوے

انج تے بدل بڑا وراؤ لگدے اکرم
دل دی بنجر دھرتی پر نا کنیاں پاوے