مسلمان دی دعا

میرے سجناں توں کہڑی اے بُھل ہوئی
ایہہ پھسّے نیں کیوں طوفان دے وچ

کِنّے بوسنیا کِنّے کشمیر نیں ہور
کدوں تک اے رہنا بحران دے وچ

کِنّی دھم سی اسلام دے بہاراں دی
نہیں آؤندے ہُن کسے بیان دے وچ

لِتی گُڑھتی ایہہ ایہناں شیطان کولوں
جہناں پایا فساد مسلمان دے وچ

جے تاں دینا سی رتبا خلیفے دا
کیوں نہ رکھیو ای سانوں اسمان دے وچ

سانوں ربّا فِر اوہ رستے وکھا
سانوں غازی بنا فِر جہان دے وچ

دیویں جذبہ توں طارق زیاد والا
ہویئے شیر نہ گدڑ میدان دے وچ

اوہ حکمت بخش توں لیڈراں نوں
لوکاں ویکھی سی جہڑی لقمان دے وچ

اوہی ساریاں ہمتاں منگاں ربّا
جہڑیاں ہوندیاں سی ٹیپو سلطان دے وچ

رہوے مسلم آپس وچ وانگ بھائیاں
کوئی آوے نہ ہور درمیان دے وچ

سکے بھائیاں وانگوں سارے مِل بیٹھن
کوئی معجزہ ہووے افغان دے وچ

اپنی امت نوں فِر اوہی چج سِکھا
جیویں پایا ایمان صفیان دے وچ

نہ تے پنجابی دے وچ کوئی فرق ہووے
نہ سندھی، بلوچی، پٹھان دے وچ

کڈھ فرقیاں دی ساریاں قیداں وچوں
برکتاں کٹھ دیاں پا مسلمان دے وچ

دیویں طاقت امان جہے لوکاں نوں توں
جہڑے لاون حیاتی سمجھان دے وچ