پیار دی سیج وچھا وے ماہی
میرے بھاگ جگا وے ماہی
لوں لوں تیری دید دا پیاسا
روح دی پیاس بجھا وے ماہی
کہندے میرے نین نشیلے
روپ دا جام اُٹھا وے ماہی
نک دی نتھلی تینوں آکھے
بانہواں گل وچ پا وے ماہی
سَک سُرمے دی ایہو مرضی
ہووے ساہ وچ ساہ وے ماہی
وصل چ بہنا وصل چ رہنا
ساری رات گواہ وے ماہی
حسن دی بارش دے وچ نہا لے
کہندی روپ گھٹا وے ماہی
حوالہ: عشق دا ورقہ پھول، گلشن ادب پبلی کیشنز لاہور؛ صفحہ 91 ( ویکھو )
