دِل لوچے ماہی یار نُوں
اِک ہسّ ہسّ گلّاں کردِیاں
اِک روندیاں دھوندیاں مردِیاں
کہو پُھلی بسنت بہار نُوں
دِل لوچے ماہی یار نُوں
میں نھاتی دھوتی رہ گئی
اِک گنڈھ ماہی دِل بہہ گئی
بھاہ لائیے ہار سنگار نُوں
دل لوچے ماہی یار نُوں
میں کملی کِیتی دُوتِیاں
دُکھ گھیر چوپھیروں لِیتی آں
گھر آ ماہی دیدار نُوں
دِل لوچے ماہی یار نُوں
بُلّھا شوہ میرے گھر آیا
میں گُھٹ رانجھن گل لایا
دُکھ گئے سمندر پار نُوں
دِل لوچے ماہی یار نُوں
حوالہ: آکھیا بلھے شاہ نے؛ محمد آصف خان؛ پاکستان پنجابی ادبی بورڈ لاہور؛ صفحہ 178 ( ویکھو )
