سب اِکّو رنگ کپاہیں دا
تانی تانا پیٹا نلیاں
پیٹھ نڑا تے چِھباں چھلیاں
آپو اپنے نام جتاون
وکّھو وکّھی جاہیں دا
سب اِکّو رنگ کپاہیں دا
چَونسی پَینسی کَھدّر دُھوتر
ملمَل خاصہ اِکّا سُوتر
پُونی وِچّوں باہر آوے
بھگوا بھیس گُسائیں دا
سب اِکّو رنگ کپاہیں دا
کُڑِیاں ہتِھیں چھاپاں چھلّے
آپو آپے نام سَوَلّے
سبھّا ہِکّا چاندی آکھو
کنگن چُوڑا باہیں دا
سب اِکّو رنگ کپاہیں دا
بھیڈاں بکریاں چارن والا
اُٹھ مجھیاں دا کرے سنبھالا
رُوڑی اُتّے گدّوں چارے
اوہ بھی واگی گائیں دا
سب اِکّو رنگ کپاہیں دا
بُلّھا شَوہ ذات کیہہ پُچھنایں
شاکر ہو رضائیں دا
جے تُوں لوڑیں باغ بہاراں
چاکر ہو ارائیں دا
سب اِکّو رنگ کپاہیں دا
حوالہ: آکھیا بلھے شاہ نے؛ محمد آصف خان؛ پاکستان پنجابی ادبی بورڈ لاہور؛ صفحہ 209 ( ویکھو )
