گھڑیالی دیو نکال نی
اج پی گھر آیا لال نی
گھڑی گھڑی گھڑیال بجاوے
رین وصل دی پیا گھٹاوے
میرے من دی بات جے پاوے
ہتھوں چا سٹّے گھڑیال نی
گھڑیالی دیو نکال نی
اج پی گھر آیا لال نی
انہد واجا وجے سُہانا
مطرب سُگھڑا تان ترانہ
بُھلّا صوم صلات، دوگانہ
مدھ پیالہ دین کلال نی
گھڑیالی دیو نکال نی
اج پی گھر آیا لال نی
مُکھ ویکھن دا عجب نظارہ
دُکھ دلدّر اٹھ گیا سارا
رَین وڈی کیا کرے پسارا
دن اگے دھرو دیوال نی
گھڑیالی دیو نکال نی
اج پی گھر آیا لال نی
مینوں اپنی خبر نہ کائی
کیہ جاناں میں کِت گوائی
ایہہ گل کیونکر چُھپے چھپائی
ہُن ہویا فضل کمال نی
گھڑیالی دیو نکال نی
اج پی گھر آیا لال نی
ٹُونے کامن کِیے بوہتیرے
سِحری آئے وڈے وڈیرے
تاں گھر آیا جانی میرے
رَہاں لکھ ورھے اس نال نی
گھڑیالی دیو نکال نی
اج پی گھر آیا لال نی
بُلّھا شوہ دی چھیج پیاری
نی میں تارن ہارے تاری
کیویں کیویں ہُن آئی واری
ہن وِچّھڑن ہویا محال نی
گھڑیالی دیو نکال نی
اج پی گھر آیا لال نی
گھڑیالی دیو نکال نی
حوالہ: آکھیا بلھے شاہ نے؛ صفحہ 289 ( ویکھو )
