علموں بس کریں او یار اکو الف تیرے درکار علم نہ آوے وچ شمار جاندی عمر ، نہیں اعتبار اکو الف تیرے درکار علموں بس کریں او یار پڑھ پڑھ، لکھ لکھ لاویں ڈھیر ڈھیر کتاباں چار چوپھیر گردے چانن، وچ انھیر پُچھو راہ؟ تے خبر نہ سار علموں بس کریں او یار پڑھ پڑھ نفل نماز گزاریں اُچیاں بانگاں چانگھاں ماریں منبر تے چڑھ وعظ پکاریں کِیتا تینوں علم خوار علموں بس کریں او یار علموں پئے قضیے ہور اکھاں والے انھے کور پِھر دے سادھ تے چھڈّن چور دوہیں جہانیں ہون خوار علموں بس کریں او یار پڑھ پڑھ شیخ مشائخ کہاویں اُلٹے مسلے گھروں بناویں بے علموں نوں لُٹ لُٹ کھاویں جھوٹھے سچے کریں اقرار علموں بس کریں او یار پڑھ پڑھ مُلّاں ہوئے قاضی اللہ علماں باجھوں راضی ہووے حرص دنوں دن تازی تینوں کِیتا حرص خوار علموں بس کریں او یار پڑھ پڑھ مسلے پیا سُناویں کھانا شک شبے دا کھاویں دسیں ہور، تے ہور کماویں اندر کھوٹ ، باہر سچیار علموں بس کریں او یار جد میں سبق عشق دا پڑھیا دریا دیکھ وحدت دا وڑیا گُھمن گھیراں دے وچ اڑیا شاہ عنایت لایا پار علموں بس کریں او یار
