ماٹی قدم کریندی یار
ماٹی جوڑا، ماٹی گھوڑا
ماٹی دا اسوار
ماٹی ماٹی نوں دوڑائے
ماٹی دا کھڑکار
ماٹی قدم کریندی یار
ماٹی ماٹی نوں مارن لگی
ماٹی دا ہتھیار
جس ماٹی پر بوہتی ماٹی
تِس ماٹی ہنکار
ماٹی قدم کریندی یار
ماٹی باغ بغیچہ ماٹی
ماٹی دی گُل زار
ماٹی ماٹی نوں ویکھن آئی
ماٹی دی اے بہار
ماٹی قدم کریندی یار
چار سَیّاں رَل کھیڈن لگیاں
پنجویں وچ سردار
ہس کھیڈ مُڑ ماٹی ہوئیاں
پوندیاں پیر پسار
ماٹی قدم کریندی یار
ہسّ کھیڈ مُڑ ماٹی ہوئی
ماٹی پاؤں پسار
بُلّھا ایہہ بُجھارت بوجھیں
لاہ سر بھوئیں مار
ماٹی قدم کریندی یار
حوالہ: آکھیا بلھے شاہ نے؛ محمد آصف خان؛ پاکستان پنجابی ادبی بورڈ لاہور؛ صفحہ 297 ( ویکھو )
