اسیں!
دھوڑاں دے وسنڑیک
تے سیالے دے جماندرو پکھی
اسیں کماندڑ دے چیراں تے،
تریل وانگ نسر کے وی لٌڑھ ناہیں سگدے
ساڈے ہڈاں چ کٌسکدیاں ہٌلیڑاں دی سٌنج،
کِدائیں دور گَمدے ڈھولیاں تے
تھریس مریندی اے
مڑ وی اسیں کدیں ناہیں رٌونے
جوں ہنجواں دے ملاہدے،
پتھراں تے چِترے ضابطیاں وانگ،
سانوں یاد راہندین
ایہ تاں ٹیبیاں دا پدھ اے
جہڑا لمے نوں جاندے راہیاں وانگ،
لمیڑ دا پکھ بنڑ کے ساڈے پَباں نال بدھائے
خبرے کدوں مٌکے!
اسیں ٹردے راہندے ہایں
جوں ساڈِیاں گھٌٹیاں نوں،
سفراں دیاں تسیاں چھڑکاں دی دھوڑ
چٌپڑِیندی اے
تے اسیں اکلہے جٌھگیاں دے چاننڑ وانگ
ڈھلدے راہندے ہایں
