ہٌن آ جا
تے مینوں چٌنڑ لا
جِویں بال مِٹھیاں بیریں دے بیر چنڑدے
یا جِویں وساکھ اچ دِھیاں کنڑک دا وڈھ
چنڑدیاں ہووِن
ہن آ جا
تے مینوں چنڑ لا
جیوں کوئی پکھو آلہنڑیں لئی ککھ چنڑدا ہوے
یا جیویں کوئی ماں اپنڑیں گبھرو دیاں
بوٹیاں چنڑیں
ہن آ جا
تے مینوں چنڑ لا
جیویں کوئی پیار کرنڑ آلا نشانی دا کِھلریا
ہار چنڑیں
یا جیویں کوئی بٌڈھڑا ڈَھے پئی عینک دے
شیشے چنڑدا ہوے
ہن آ جا
تے مینوں چنڑا لا
جیویں سِردوپاہریں سوانیاں مکئی دِی فصل چنڑدیاں
یا جیویں کوئی ونڈواڑ دے کھیتاں چوں
پھٌٹیاں چٌنڑیں
ہنڑ آ جا
تے مینوں چنڑ لا
جیویں کوئی بھکھی چڑی اپنڑیں بچیاں کانڑ
چوگ چنڑدی
یا کِیڑیاں دی قطار اپنڑیں سال دا
کھاوٌنڑ چنڑیں
ہنڑ آ جا تے
مینوں چنڑ لا
جیویں کوئی مصور اپنڑیں تخلیق لئی رنگ چنڑدا
یا جویں کوئی پردیسی گل کرنڑ لئی
لفظ گولیندا ہوئے
ہن آ جا
تے مینوں چنڑ لا
جیویں پتھر ہوئیاں اَکھیں راہواں تے کھلری
اڈیک چنڑدیاں
یا تِڑک گئے ہتھ مِٹی تے وِٹی پئی
بھٌکھ چنڑین
ہن آ جا
تے مینوں چنڑ لا
جیویں چہرے اپنڑِیاں شکلاں دے نشانڑ چنڑدے
یا پَیراں دے چھالے انجان منزلاں چ سٌتے
کنڈے چنڑدے ہووِن
ہن آجا
تے مینوں چنڑ لا
جیویں کوئی مٹیار اپنڑیں وال سجاونڑ لئی
سریہوں دے پھٌل چنڑدی
یا پھپھڑدی رٌت چ موت کسے جوان دا ہاسا
چنڑ لوے
ہن آ جا
تے مینوں چنڑ لا
میرا پِنڈا اِنج سٌنج ہویا اے
جیویں تَوے توں دٌھوڑ اڈ جاوے
ہن آ جا،
تے مینوں چنڑا لا.......!!!
