اپنی گل توں آپے ای رَد کردا ایں

اپنی گل توں آپے ای رَد کردا ایں
مونہوں جو کُجھ کہنا ایں کد کردا ایں

وَکھری گل اے میریاں آساں ڈھیاں نہیں
تُوں تے سجناں بڑا تردد کردا ایں

ساڈا سچ وی توڑ نہ چڑھیا ہریا اے
تیرا کھوٹ وی پُگدا اے تد کردا ایں

نواں شکار کرن دا لگدا چارا اے
خال نمایاں ہور تکھے خَد کردا ایں

لوکی تے کھمباں توں ڈار بناندے نیں
گل نُوں گوہ نال جاچیا کر جد کردا ایں

کد تک اوڑک پباں بھار کھلوویں گا
اَڈیاں چُک چُک کیویں اُچا قد کردا ایں

چیکاں کدھرے للکارے نہ بن جاون
سوچ لیا کر جدوں تشدد کردا ایں

خود غرضاں توں رکھیں آس وفاواں دی
جھلیا شیدا توں وی تے حد کردا ایں