توں کیہ سمجھیا تیرے کولوں دل دا بھید لُکاواں گی
تیرے لاگے بہہ کے تے میں اکھیں نیر وگاواں گی
ایس زمانے اندر میرا کُڑی ہونا کوئی جرم نہیں
عشق دی پوڑی چڑھ کے اپنے دل دی گل سناواں گی
دل دروازے کھول کے اپنے حداں ٹپ کے خوف دیاں
دبے ہوئے سچ نوں اندروں کڈھ کے باہر لیاواں گی
تیرا پیار جے چانن بن کے اُترے میری روح اندر
عشق تیرے دے بال کے دیوے دل دہلیز سجاواں گی
عشق دی ویل نہیں چڑھنی سوکھی پر سجنا میں سوچ لیا
پاک نیناں دا پانی لا کے ایہنوں توڑ چڑھاواں گی
رب کرے ایہ پیار دی مہندی رنگے میریاں تلیاں نوں
سوہنے رنگ دیاں ونگاں پا کے ریجھاں نال چھنکاواں گی
جے کر میرے بُوہے ڈھکیں لاہ کے خوف زمانے دے
تیرے ناویں جندڑی لا کے ساری عمر نبھاواں گی
