فاصلے دل دے لمیرے، کی کراں؟
بیٹھ کے میں نال تیرے، کی کراں؟
سوچدا ہاں رات نوں رُشنا لواں،
خار کھاندے نے ہنیرے، کی کراں؟
جد کدے پیراں نے ٹھانی ٹُرن دی،
مگھدیاں نیناں نے گھیرے، کی کراں؟
کرن نہ روشن جو نھیری رات نوں،
میں تیرے سندر سویرے، کی کراں؟
گھوردی ہر رات زلفاں کھول کے،
دیکھ کے سفنے ودھیرے، کی کراں؟
سُنّیاں پئیّاں نے گلیاں دل دیاں،
سکھنے جھاکن بنیرے، کی کراں؟
دین نہ تپدے دِلاں نوں جو ہوا،
جُھنڈ زلفاں دے گھنیرے، کی کراں؟
دیر پچھوں ملن دا شکوہ نہ کر،
حال ہی ایسے نے میرے کی کراں؟
جس نوں اکھاں تے بٹھایا 'نور' نے،
ٹُر گیا نظروں پریرے، کی کراں؟
