میں وی اِکوَنجا دا ہویا اوہ وی ڈُھکی چھیالی نوں
پنجِھی ورھیاں توں ودھ ہوئے گل وِچ پئی پنجالی نوں
اس واری وی سرکاراں دے وعدے پورے ہوئے نہ
اس واری وی راشن پانی لیا ادھار دیوالی نوں
اس واری وی لَچھمی ساڈے گھر دے پِچھیوں لنگھ گئی
لارے لا کے خوش کیتا اس واری وی گھر والی نوں
چنگا کیتا اتھرواں نے پانی دے کے لوڑاں نوں
ترس گئے سن دل دے ڈھگے اؤڑاں وچ جگالی نوں
پھیل گیا زہری پردوشن بھاویں وچ خلاواں دے
جٹّ نے کھتے ویہلے کیتے لا کے اگّ پرالی نوں
موسم والے دے دیون سُوہ پہلاں ہی برساتاں دی
اج کل بچے چیتے کردے 'ہالی نوں نہ پالی' نوں
گاتھا گنجھل دار بنائی سائنس دیاں ایجاداں نے
پکے عاشق ہُن نہ ورتن نظراں دی دونالی نوں
کیہڑا پجّ بنا کے موڑاں ربّ نے اک دل دِتا ہے
آس لگا کے در 'تے منگن بیٹھے روپ سوالی نوں
کوئی چنگا شعر سنا کے 'نور' کدے تاں پوری پا،
دنیاں منّے مونا لیزا دی تصویر خیالی نوں
