چھڈو قصے دیوتیاں دے، اس دُنیا دی بات کرو

چھڈو قصے دیوتیاں دے، اس دنیاں دی بات کرو
سجریاں گھٹناواں دیکھو، بوسنیا دی بات کرو

حالے وی وِس گھولے جِتھے، مریا سپّ زمانے دا،
جوجھ رہے نے لوکی جتھے، چیچنیا دی بات کرو

پت جھڑ تے ہنجُو نہ کیرو، آئی ہے مڑ جاوے گی،
آئیاں نے جو سُکن تے، فصلاں ہریاں دی بات کرو

اگّ بگولا ہویا ٹکڑا، رہِ نہ جاوے دھرتی دا،
چپے چپے اُتے جا کے، دوستیاں دی بات کرو

ویہلے ہو کے لبھّ لواں گے، کارن بمب بلاسٹ دا،
ایدھر اودھر کِھنڈیاں پئیاں، آنتڑیاں دی بات کرو

بھگت چکا جو سارا جیون، اوس نوں ایتھوں ٹُرن دیو،
جین لئی رو رہیاں عمراں، توتلیاں دی بات کرو

دیکھ لواں گے سازش پِچھے، ہتھ بیگانے لوکاں دا،
پہلاں آپس دے وچ ودھدے، فاصلیاں دی بات کرو

پھیر کِتوں مڑ کے آئی ہے، دل وچ دیوی یاداں دی،
شردھاواں دے ٹلّ وجاؤ، آرتیاں دی بات کرو

ورھیاں پچھوں پرت ریہا ہے، محرم 'نور محمد' دا،
چھتاں اُتے دیپ جلاؤ، روشنیاں دی بات کرو