عمراں پِچھوں فجراں جاگیاں

اج میں پاہلی واری اپنا
قد انبراں توں اُچا ڈِٹھا
عمراں پِچھوں فجراں جاگیاں
چُلھیوں دھوں نِکلدا ڈِٹھا

جیہڑی ازلوں گونگی ہائی
اج مدھانی بولن لگ پئی
جُگ جُگ جیوے تَس مری نوں
پَیراں ہیٹھ مدھولن لگ پئی

اج میں اپنی کنک دی روٹی
گھر دی لسّی دے نال سُرکی
اوسے ڈھیر بھروسے دِتّے
جیہڑی جیہڑی کھادی بُرکی

ربّ کرے ایہہ انبر شالا
مُڑ نہ اُچّے ہو کھلوون
مُڑ نہ گجراں جاگدیاں نوں
تیتھوں ناصؔر کدی ایہہ کھوون