جے ایس رات سویرا ہونا ایں
مُڑ تاں توں وی میرا ہونا ایں
میں ہونا ایں اپنے اولھے
روندا چار چوفیرا ہونا ایں
مینوں جیوندا رکھن دے لئی
میرا مرن بتیرا ہونا ایں
ہک واری من ویکھیں دل دی
مُڑ کے حال جو تیرا ہونا ایں
ایویں کسے نہیں تینوں سدیا
اوتھے گُھپ ہنیرا ہونا ایں
توں وڑھنا ایں ویڑھے میرے
مُڑ ہر کد بنیرا ہونا ایں
جِتھے ڈُبیا ساں میں اوتھے
اج وی گُھمن گھیرا ہونا ایں
موت دے ویڑھے تیرا ناصر
جوگی آلا پھیرا ہونا ایں
