اپنیاں توں دُوری کیہ؟

اپنیاں توں دُوری کیہ؟
ایسی وی مجبوری کیہ؟

اک اصل اے ساریاں دی
خاکی، ناری، نوری کیہ؟

چاہت تے بس چاہت اے
ادھی کیہ تے پوری کیہ؟

نظراں ہیٹھ مدھول نہ دل
اینی وی مغروری کیہ؟

پیار توں ودھ پیاری اے
جھڑکی کیہ تے گھوری کیہ؟

آ جا ! بنے لا لیئے
چھڈنی گل ادھوری کیہ؟

کیہ پرواہ اے عاشق نوں
رسوائی، مشہوری کیہ؟

تیرے ساہواں دی خوشبو
ہور بھلا کستوری کیہ؟

رُکھی سُکھی لبھ جاوے
مزدوراں نوں چُوری کیہ؟

جگ وچ شاہد پیار توں ودھ
کوئی کم ضروری کیہ؟