ویرا تیرا لہو میں گھوڑا رنگیا
تے آپ پھکی پے گئی
تیری پگ تروپے لائے
تے سنگدیاں سنگدیاں تیری عزت کھری کر دتی
ہُن گھر وچ بہہ کے بھین دا نہیں عورت دا انتظار کر
میں تیری فرمائشی عورت آں
ہُن میں تیریاں کڑیاں لئی ونگاں نہیں خرید سکدی
کہ اگ میں وٹی اے
ویرا تیرا شجرہ میرا شجرہ نہیں
تینوں میرے لہو دے قطرے دی واج نہیں آ سکدی
ایہ کی روانی اے
تیری بُھکھ تے میرا تراہ نکل جاندا اے
توں میری ہک تے سوانگ رچائے
میں اپنے بدن دیاں کُنڈیاں کھولیاں
توں مینوں لڑلیا کے دتے
میری شلوار تیری بیوی نے ہنڈھا چھڈی
میرا دوپٹہ تیری ماں نے ہنڈھا چھڈیا
تے مُندری میں کوٹھا لاون والی نوں دے چھڈی
ویرا! کوڑا اوہدی روزی سی آ
ویرا میں تیرے واسطے کُوڑ تاپے نیں
فیر وی توں کتوں کتوں ننگا رہ جاویں گا
ویرا دُکھاں وچ تروٹ
کِتے میرے ماس واسطے تینوں ہٹی نہ کھولنی پئے
کِتے میری ہٹی دا ناں ویر نہ ہوئے
ویرا تیری ہٹی تے میرا ناں لکھیا اے
ہُن سودا کویں وکے گا
