آجا پیاریا آ میرے کول بہہ جا
اَج جی بھر کے گلّاں کر لئیے
ایس جِندڑی تے ککھ کنڈیاں توں
جو کُجھ لبھ سکّے جھولی بھر لئیے
عُمر چکراں دے وِچ بِیت چلّی
آ جا اَج تے رج کے بہہ لئیے
گلّاں کِیتیاں نیں جیہڑِیاں سو واری
اوہو اِک واری ہور کہہ لئیے
دُکھ ہجر تے وصل دے لکھ سہے
جیہڑے نہیں سہے اوہ وی سہہ لئیے
کدی رو کے قہقہے مار دئیے
کدی ہسِیے تے ہاواں بھر لئیے
واج نکلے نہ کِسے ہور پاسے
گلّاں کِسے نُوں وی کرن دیوئیے نہ
پا کے بیڑیاں وقت کھلھار لئیے
وَدھن دیوئیے نہ مُڑن دیوئیے نہ
تنگ ہو کے رات جے جان لگّے
ہور اِک رات اوہدے اگّے دھر لئیے
آجا پیاریا آ مرے کول بہہ جا
اج جی بھر کے گلّاں کر لئیے
ایس جِندڑی دے ککھ کنڈیاں توں
جو کُجھ لبھ سکّے جھولی بھر لئیے
حوالہ: نظراں کردیاں گلّاں، صوفی غلام مصطفٰی تبسم ( ویکھو )
