تیرے ہتھاں دے کورے کاگت اُتے
میں دستخط کیتے
تے ظلم دے ہتھوں ساہ ہار دے ہر بندے نوں
دل دا کفن دِتا
تیری تلی اُتے
میریاں اکھاں دیوے بن گئیاں
تے جیویں ہنیرا مُک گیا ہووے
غریب وستیاں دے کالے پلاں دا
میں تیرا ہتھ پھڑ کے ٹُریا
تے اک بھکھ مریا بال مسکرایا اپنی ماں دی جھولی وچ
تیرا پیار منشور اے
ہارے دلاں دا
تے تیرا پیار اک گاون اے
مردے ہونٹھاں دا
تے تیرا پیار اک تارا اے
ہنیریاں راتاں اندر بھٹک جان والے پیراں لئی
تے تیرا پیار
اک باری
بندی خانے دے اکلا پے وچ پئے سنگیاں لئی
تیرا پیار ، درد مندی
ساری انسان ذات لئی
تے تیرے ہتھاں دے کورے کاگت اُتے
چھوہ میرے ہتھ دی
تے چھوہ سارے جگ دی
حوالہ: میریاں نظماں موڑ دے؛ صفحہ 38