بھاویں میرا لوہی جاوے، ماضی حال شریکا
میرا ہر اک دور چ رہنا، سورج نال شریکا
میں نیہرے دی جوہ وچ جد وی، لہو دے دیوے بالے
میرے ساہویں آن کھلوتا، پالو پال شریکا
اک تے ویلے دے جالے نے، قیدی کیتا مینوں
دوجے پاسے بُندا رہندا، نفرت جال شریکا
میں ورھیاں دا پندھ مکا کے، جد منزل تے پُجا
اُچن چیتی چلیا رل کے، وکھری چال شریکا
اوڑک اک دن مکّ جانا اے، اوہ جبراں دا موسم
سدا نئیں ایتھے پاؤندا رہنا، انج دھمال شریکا
بھاویں اکرم باغی رتّ نے لکھّ ابالے کھادے
پھر وی نال سیانپ مینے دتا ٹال شریکا
