کِدے جاویے
جدوں ککھاں نال اونڑیں خواباں دے چھپر،
ساڈِیاں رٌوحاں چٌوں اٌٹھدے ہَنیراں دے،
پہلے جھولیاں چ اٌڈ جَاوِنڑ
جدوں وَرہیاں دے پَدھاں کانڑ اٌسارے حوصلے،
ساڑے گِٹیاں توں واہے جاوِنڑ
کِدے جاویے
جدوں کائناتاں نوں چیر کے وہدیاں اَکھیں اگوں،
ہنیریاں دا مینہ وس پَوے
جدوں بہاراں دے رنگ چَڑھنڑ توں پہلے،
پٌھولاں چوں تَس بٌھگیندِیاں ناڑاں دِسنڑ
لگ پوِنڑ
کِدے جاویے
جدوں زندگی دے ساہوں نوں کھاندے رَش اِچ،
اَپنڑیاں شَکلاں دا چیتا بٌھل جاوے
جدوں سِراں چوں جَمدے عمراں دے جھکھڑاں چ،
بٌھلیکھیاں دا سیک وَدھ جاوے
کِدے جاویے
جدوں کَچِیاں سَڑکاں دے وَلاویں ٹردیاں ہویاں،
ساڈیاں پیراں چوں اٹھدی،
سوج بنڑ جاوِنڑ
جدوں ہتھاں چوں کاں اڈا کے تے اسیں بکینڑاں دی
چھاویں پسینے وہا چھوڑیے
کدے جاویے
جدوں راتاں نوں پاسے پَرتیندیاں پدھ نہ مکے،
تے ہٌوکاں دے سٌر کھڑی جاونڑ
جدوں سِر تے چڑیاں دھٌپاں چ ٹَھڈِیاں
بوہڑیں دے مٌڈھاں نوں
آرے پھیر بہیے
کدے جاویے
جدوں ذات دے کوٹھڑے نوں چِیکاں دا
گھٌنڑ کھاوِنڑ لگ پوے،
تے ساڈے سگَھ مر جاونڑ
جدوں اکھیں دا پانڑیں سٌک جاوے ،
تے خون ساڈِیاں پلکاں دِیاں نٌکراں تایں نِتر آوے
کدے جاویے
جدوں ہاسیاں دا سانبھ کے رکھیا نقشہ وِسار بہیے
تے اپنڑیں ہوٹھاں تے پَیاں تِڑکاں چ،
لوریاں دے بول مڑھیے چا
کِدے جاویے؟
