توں سچا ایں

عشق دی سُولی آپ چڑھی میں
دل دے ہتھوں آپ مری میں
ہجر دی اگ وچ آپ سڑی میں
توں سچا ایں
توں تے عشق کدے نہیں کیتا
نہ توں عشق پیالہ پیتا
توں تے صرف مذاق سی کیتا
توں سچا ایں

جگ نال آڈھا آپ میں لایا
تیرا عشق پگانا چاہیا
ہتھوں اپنا آ گوایا
توں سچا ایں

توں نہیں دُھپ چوں کڈھیاں چھاواں
توں نہیں سُکنے پائیاں ہاواں
توں نہیں تکیاں میریاں راہواں
توں سچا ایں

شوہ دریا وچ چھال وی ماری
تیرے ناں توں جِندڑی ہاری
کھول نہ سکیوں دل دی باری
توں سچا ایں

اندر وڑ کے روندی رہیاں
آپے رو رو چُپ کر گئیاں
توں نہ اج تائیں خبراں لئیاں
توں سچا ایں

نائلہ عشق کمانا اوکھا
چانن نوں دفنانا اوکھا
جیندیاں جی مرجانا اوکھا
توں سچا ایں