خدمت ماں دی

جے ماں تیری جیوندی سجناں اس نوں کدے ستاویں نہ
فرض ھے تیرا خدمت ماں دی کر احسان جتاویں نہ

ماں مر جاؤ سوچ سمجھ کے اک اک قدم اٹھاویں توں
کم دی گل نوں پلّے بنھ لئیں مڑ کے توں پچھتاویں نہ

ماں کے دھو کے پیر پیا کر، رب راضی ہو جاوے گا
ماں دے قدماں دے وچ جنت اس نوں توں ٹھکراویں نہ

ماں دیاں جھڑکاں رحمت بن کے تیرے لئی آ جاندیاں نیں
جھڑکاں جر لئیں ماں دیاں ہس کے ایویں توں گھبراویں نہ

ماں دے ہاڑے سب توں پہلے عرشاں تے رب سن دا اے
جے دکھ آوئے ماں دے کولوں اس نوں کدے لکاویں نہ

تڑکے اٹھ کے ماں دا مکھڑا دیکھنا عین عبادت ہے
بدبختی ہے دوری ماں توں اس نوں توں گل لاویں نہ

ماپیاں نوں کوئی دُکھ نہ دیویں حکم ہے باری تعالی دا
ماپیاں نوں دبکا کے کیتی کتری کھوہ وچ پاویں نہ

ماں دیاں مٹّھیاں مٹّھیاں لوریاں ھر ویلے توں یاد رکھیں
دنیا داری دے وچ پے کے ماں نوں کدے بھلاویں نہ

نور احمد شاہ ماں نے تیں نوں اپنے گن ورتائے نیں
ایہہ گن نیں سرمایہ تیرا ایہ گن کدے گنواویں نہ