گھیری دے وچ بیڑی دُور کنارا، کیہ کریے
موت کھلوتی کھول کے بانہواں چارا، کیہ کریے
آکھن وی نہیں ہوندا بے اتبارا، کیہ کریے
لا جاندا اے روز نواں اک لارا، کیہ کریے
اکلاپے دا ڈنگیا، سُن کے تیرے جاون دا
سہم گیا اے، دل ایہ درداں مارا، کیہ کریے
مہنگ سمے نے جین دا حق وی کھوہ لیا، لوکاں توں
مِلدا نہیں کدھرے وی سُکھ اُدھارا، کیہ کریے
گل گل وچوں جیہڑا لڑن بہانے لبھدا اے
دَسو ایسے اَکھڑ نال گزارا، کیہ کریے
اس واری تے شاہد دل وی ہمت ہار گیا
چُک نہیں ہوندا ہجر دا پتھر بھارا، کیہ کریے
حوالہ: رُتاں اجے الانیاں، رزاق شاہد؛ البرکت پبلشرز ملتان؛ صفحہ 39 ( ویکھو )
