اُردو بولن والیے کُڑیے
تُوں کیہ جانیں
وارث شاہ دی ہیر کہانی
بُلھےشاہ دے پَیر دے گھنگرو
شاہ حسین دی سُچل کافی
آدم زاد دی پہلی معافی
اُردو بولن والیے کُڑیے
تُوں کیہ جانیں
چلدے کُھوہ دیاں وگدیاں ٹِنڈاں
کھیتاں وچ کھلوتے بنّے
اَوس فجر دی
بانگ ڈِگر دی
اردو بولن والیے کُڑیے
تُوں کیہ جانیں
بَگی اکھ دا کالا سُرمہ
صندل بانہہ وچ نچدا کنگن
نک دی نتھلی
سُر وچ وجدی پیار دی ونجھلی
اردو بولن والیے کُڑیے
توں کیہ جانیں
فجراں دے وچ رِڑکی لسّی
لسّی دے وچ تَردا مکھن
شِکر دوپہرے بھخدی روٹی
امب دی پھاڑی
وچ تندور دے بُھنیا بینگن
گُڑ گُڑ کردا شام دا حُقہ
ویہڑے دے وچ گِڑدا نلکا
ہجر وچھوڑے کَتدا چرخا
اردو بولن والیے کُڑیے
توں کیہ جانیں
