ਉਰਦੂ ਬੋਲਣ ਵਾਲੀਏ ਕੁੜੀਏ
ਤੂੰ ਕੀ ਜਾਨੇਂ
ਵਾਰਿਸ ਸ਼ਾਹ ਦੀ ਹੀਰ ਕਹਾਣੀ
ਬੁੱਲ੍ਹੇ ਸ਼ਾਹ ਦੇ ਪੈਰ ਦੇ ਘੁੰਗਰੂ
ਸ਼ਾਹ ਹੁਸੈਨ ਦੀ ਸੁਚੱਲ ਕਾਫ਼ੀ
ਆਦਮ ਜ਼ਾਦ ਦੀ ਪਹਿਲੀ ਮਾਫ਼ੀ
ਉਰਦੂ ਬੋਲਣ ਵਾਲੀਏ ਕੁੜੀਏ
ਤੂੰ ਕੀ ਜਾਨੇਂ
ਚਲਦੇ ਖੋਹ ਦੀਆਂ ਵਗਦੀਆਂ ਟਿੰਡਾਂ
ਖੇਤਾਂ ਵਿਚ ਖਲੋਤੇ ਬੰਨੇ
ਓਸ ਫ਼ਜਰ ਦੀ
ਬਾਂਗ ਡਿਗਰ ਦੀ
ਉਰਦੂ ਬੋਲਣ ਵਾਲੀਏ ਕੁੜੀਏ
ਤੂੰ ਕੀ ਜਾਨੇਂ
ਬੱਗੀ ਅੱਖ ਦਾ ਕਾਲ਼ਾ ਸੁਰਮਾ
ਸੰਦਲ ਬਾਂਹ ਵਿਚ ਨੱਚਦਾ ਕੰਙਣ
ਨੱਕ ਦੀ ਨਥਲੀ
ਸੁਰ ਵਿਚ ਵੱਜਦੀ ਪਿਆਰ ਦੀ ਵੰਝਲੀ
ਉਰਦੂ ਬੋਲਣ ਵਾਲੀਏ ਕੁੜੀਏ
ਤੂੰ ਕੀ ਜਾਨੇਂ
ਫ਼ਜਰਾਂ ਦੇ ਵਿਚ ਰਿੜਕੀ ਲੱਸੀ
ਲੱਸੀ ਦੇ ਵਿਚ ਤਰਦਾ ਮੱਖਣ
ਸ਼ਿਕਰ ਦੁਪਹਿਰੇ ਭਖ਼ਦੀ ਰੋਟੀ
ਅੰਬ ਦੀ ਫਾੜੀ
ਵਿਚ ਤੰਦੂਰ ਦੇ ਭੁੰਨਿਆ ਬੈਂਗਣ
ਗੁੜ ਗੁੜ ਕਰਦਾ ਸ਼ਾਮ ਦਾ ਹੁੱਕਾ
ਵਿਹੜੇ ਦੇ ਵਿਚ ਗਿੱੜਦਾ ਨਲ਼ਕਾ
ਹਿਜਰ ਵਿਛੋੜੇ ਕੱਤਦਾ ਚਰਖ਼ਾ
ਉਰਦੂ ਬੋਲਣ ਵਾਲੀਏ ਕੁੜੀਏ
ਤੂੰ ਕੀ ਜਾਨੇਂ
