دشمن تیرے چار چوپھیرے
کلّی تیری جان
باطل دے لکھ گُھمّن گھیرے
حق دا اِک ایمان حق دا اِک ایمان
آپنے سچے قول تے اَڑ کے
اگ دے طوفان وِچ لَڑ کے
تُوں ایہہ پاکستان بنّایا
اس دی شان تے مان دی خاطر
آپنے دِین ایمان دی خاطر
جان کیتی قربان
جیہڑے موت کولوں نئیں ڈر دے
اوہ اِنسان کدی نہیں مَردے
تُو ہَیں زنّدہ قائدِ اعظمؒ
زنّدہ ہے پاکستان
اُچِیاں اُچِیاں نظراں والیا
ایدھر اکھّاں موڑ
اَج پھیر تیرے شَدائِیاں نُوں
تیری پئی گئی لوڑ
اوہو ایمان تے اوہو جذبہ
اوہو دل تے اوہو سدھراں
اوہو پیارِیاں پیارِیاں مدراں
کِسے نہ شَے دی لوڑ
خبر دی کِدھرے اوکھے ویلے
ایدھر جان جے ایہہ بچارے
تیری یاد دے لین سہارے
آپنی ایسے یاد دے صدقے
پیار دا رِشتہ جوڑ
تُوں ہی ایہناں نُوں راہے پایا
تُوں ہی پہنچا دے توڑ
حوالہ: نظراں کردیاں گلّاں، صوفی غلام مصطفٰی تبسم ( ویکھو )
