ساڈے عشق دے چمکدے لیکھاں تے

ساڈے عشق دے چمکدے لیکھاں تے، ڈاڈھے غماں دِیاں سیاہیاں ڈھلّ گئیاں
جیہڑے حُسن تیرے چمکائیاں سَن، اوہ چاننیاں راتاں رُل گئیاں

ایس عشق نمانڑے دے دھاگے دِیاں کُجھ ایڈ اوّلّڑیاں گُنجھلاں سَن
کُجھ کھولدے کھولدے ہور پئیاں، کُجھ پَیندِیاں پَیندِیاں کُھلّ گئیاں

گلّاں مِٹھِیاں مِٹھیاں پیار دِیاں، جیہڑِیاں دوہاں نے بیٹھ کے کِیتیاں سَن
جیہڑِیاں نال اساڈڑے بِیتیاں سَن، سانُوں یاد رہیاں تہانوں بُھل گئیاں

کُجھ ایسِیاں وی کرماں والِیاں سن، بُھل بُھل کے ترے در جا لگِیاں
کجھ ایسِیاں بخت نمانڑِیاں سَن، راہ چَلدے چَلدے بُھل گئیاں

ساتھوں تیری محبّت دِیاں یاداں نُوں، ایس جگ دیاں دُکھڑیاں کھوہ لیتا
ایہہ یاداں کیڈِیاں نعمتاں سَن، کیہڑے مُل آئِیاں کیہڑے مُل گئِیاں

کِیہ دُکھڑے پھولنا ایں سجنا اوے، قدم رکھ کے عشق میدان دے وِچ
تُوں اِک جوانی نُوں روونا ایں، ایتھے کئی جوانیاں رُل گئیاں