اسیں پِھر وی درداں مارے آں

بھاویں بیبے، سوہن سنکھے آں
بھاویں سورج، چن یا تارے آں
بھاویں ساون، بھاویں چیتر آں
بھاویں پوناں پینگھ ہلارے آں
اسیں پِھر وی درداں مارے آں

بھاویں کھیت اُگایئے تاریاں دے
بھاویں پینگھ چڑھایئے اسمانیں
بھاویں پیار دِلے دی لاٹ بنے
بھاویں یار بنے گل دی گانی
بھاویں باپ دے مُکھ دے نیتر آں
بھاویں ماں دے راج دُلارے آں
اسیں پھر وی درداں مارے آں

بھاویں نار توں فخر چھڑا لئیے
بھاویں نور توں سیس گندا لئیے
بھاویں عرش دی جُوہ ستکار دوے
بھاویں خلق دا شرف کہا لئیے
بھاویں عکس خدا دے بھیتر آں
بھاویں بیت عتیق توں بھارے آں
اسیں پھر وی درداں مارے آں

بھاویں ہڈ ہڈ رچیا یار ہووے
بھاویں ساہ ساہ ڈُلھدا پیار ہووے
بھاویں لُوں لُوں وسدی پِیت ہووے
بھاویں انگ انگ وجد شرار ہووے
بھاویں ریجھ دے بھرویں کھیتر آں
بھاویں آس دے محل منارے آں
اسیں پھر وی درداں مارے آں