ایناں چھوٹا گھیرا نہ کر باہاں دا
روکٹ داغ دواں گا بُھکھیاں آہاں دا
نظراں دی 'اے کے سنتالی' چلنی نہیں،
دل ہے کھوجی کتا بھیتی راہاں دا
من دی 'سیٹی لائٹ' ٹکا کے پرکھاں گے،
کس تے سُٹدا ایں توں بمب نگاہاں دا؟
جنگ چھڑی ہے جد توں نیناں نیناں دی
اسلحہ خانہ گرم دِسے افواہاں دا
'لنکا' وانگوں ساڑے دل دی دھرتی نوں
گھلے جد اوہ بُلھا تَتے ساہاں دا
روپ دیاں تَپیاں بارودی سُرنگاں نوں،
لنگھے کداں 'بکتر بند' نگاہاں دا؟
ایٹم بمب بناؤ اک غزلاں دا نور
پھٹ کے پاج ادھیڑے جیہڑا شاہاں دا
