تُوں ہَر جانا ای، مُڑ نہ آکھیں

تُوں ہَر جانا ای، مُڑ نہ آکھیں
میں مر جانا ای، مُڑ نہ آکھیں

تُوں ہاسے نال بھانویں آکھیا
میں کر جانا ای، مُڑ نہ آکھیں

میرے اندر جھات نہ پاویں
جے گھر جانا ای، مُڑ نہ آکھیں

عقلے اُنج توں ہٹکی رکھیں
میں پر جانا ای، مُڑ نہ آکھیں

ایس ظلم تے مان اے تینوں
میں جَر جانا ای، مُڑ نہ آکھیں

مینوں وچوں جے کڈھیو ای
منظر جانا ای، مُڑ نہ آکھیں

راتے مینوں سون نہ دیویں
چن ٹھر جانا ای، مُڑ نہ آکھیں

پتھرا ڈُب کے توں ای مرنا اے
ککھ تَر جانا ای، مُڑ نہ آکھیں

توں آکھیں تے آ جانا میں
اودھر جانا ای، مُڑ نہ آکھیں

جے نہ چنگا پُتر جمیوں ای
اوتر جانا ای، مُڑ نہ آکھیں

نیویں اے تھارے، اج لگدا اے
مینہ ور جانا ای، مُڑ نہ آکھیں

مینوں چا کے بھوئیں تے ٹرنا ایں
نگھر جانا ای، مُڑ نہ آکھیں

اکھ توں اکھر سوچ کے منگیں
دل کھر جانا ای، مُڑ نہ آکھیں

مینوں مار کے کنج لویں
میں کھلر جانا ای، مُڑ نہ آکھیں

سوئی دا سد سُنن توں پہلوں
ناصر جانا ای، مُڑ نہ آکھیں