ਜੱਗ ਦੇ ਅੰਦਰ ਪਿਆ ਸਕੂਨ ਦਾ ਕਾਲ਼ ਜਿਹਾ
ਲਗਦਾ ਏ ਹਰ ਇਕ ਬੰਦਾ ਖੁੰਝੇ ਬਾਲ ਜਿਹਾ
ਹਰ ਸੀਨੇ ਵਿਚ ਧੁੜਕੂ ਲਾਇਆ ਵੇਲੇ ਨੇ
ਹਰ ਇਕ ਚਿਹਰਾ ਜਾਪੇ ਇਕ ਸਵਾਲ ਜਿਹਾ
ਅੱਜ ਵੀ ਰੁੱਤਾਂ ਅਪਣਾ ਰੰਗ ਪਰ ਤਾਇਆ ਨਈਂ
ਅੱਜ ਵੀ ਮੌਸਮ ਲਗਦਾ ਏ ਪਿਛਲੇ ਸਾਲ ਜਿਹਾ
ਇਸ ਦੇ ਸੀਨੇ ਦੇ ਵਿਚ ਅੱਤ ਹਨੇਰਾ ਸੀ
ਜਿਸਦਾ ਚਿਹਰਾ ਹੈ ਸੀ ਇਕ ਮਿਸਾਲ ਜਿਹਾ
ਜੇ ਨਾ ਰੱਖੇ ਯਾਦ ਹਵਾਲੇ ਮਾਜ਼ੀ ਦੇ
ਮੁਸਤਕਬਿਲ ਵੀ ਹੋਣਾ ਏ ਸਾਡਾ ਹਾਲ ਜਿਹਾ
ਮੰਡੀ ਦੇ ਵਿਚ ਆ ਕੇ ਕਿਸੇ ਬਿਪਾਰੀ ਨੂੰ
ਦੂਜਾ ਮਾਲ ਨਈਂ ਲਗਦਾ ਆਪਣੇ ਮਾਲ ਜਿਹਾ
ਜਿਹੜਾ ਵੀ ਦੂਜੇ ਦਾ ਦਰਦ ਵੰਡਾ ਨਦਾ ਏ
ਸਮਝੋ ਉਹਨੂੰ ਗ਼ੌਸ ਕੁਤਬ ਅਬਦਾਲ ਜਿਹਾ
ਹਵਾਲਾ: ਮੋਤੀ ਸੋਚ ਸਮੁੰਦਰ ਦੇ, ਸਫ਼ਾ 107 ( ਹਵਾਲਾ ਵੇਖੋ )
