ਜੀਹਨੂੰ ਆਪਣੀ ਪਹਿਚਾਣ ਨਹੀਂ ਏ
ਉਹ ਇਨਸਾਨ ਇਨਸਾਨ ਨਹੀਂ ਏ
ਮੇਰੇ ਦਿਲ ਦਾ ਹਾਲ ਨਾ ਜਾਣੇ
ਏਨਾ ਉਹ ਅੰਜਾਣ ਨਹੀਂ ਏ
ਤੇਰੇ ਨਾਲ਼ ਪਿਆਰ ਕੀਤਾ ਏ
ਹੁਣ ਕੋਈ ਅਰਮਾਨ ਨਹੀਂ ਏ
ਕਦਮ ਕਦਮ ਤੇ ਮਰਨਾ ਪੈਂਦਾ
ਜੀਉਣਾ ਕੋਈ ਆਸਾਨ ਨਹੀਂ ਏ
ਤੂੰ ਕਿਆ ਮੇਰੇ ਗ਼ਮ ਨੂੰ ਜਾਣੇ
ਤੇਰੇ ਵਿਚ ਤੇ ਜਾਣ ਨਹੀਂ ਏ
ਆਜਾ ਮੇਰੇ ਦਿਲ ਵਿਚ ਆਜਾ
ਇਥੇ ਕੋਈ ਦਰਬਾਨ ਨਹੀਂ ਏ
ਮੁਲਾਂ ਦਾ ਈਮਾਨ ਏ ਜੋ ਵੀ
ਉਹ ਮੇਰਾ ਈਮਾਨ ਨਹੀਂ ਏ
ਓਥੇ ਕਈ ਮਜਨੂੰ ਵਸਦੇ ਨੇਂ
ਸਿਹਰਾ ਤੇ ਵੀਰਾਨ ਨਹੀਂ ਏ
ਸਭ ਨੂੰ ਉਸ ਹੈਰਾਨ ਕੀਤਾ ਏ
ਫੇਰ ਵੀ ਉਹ ਹੈਰਾਨ ਨਹੀਂ ਏ
ਮੈਂ ਕੀ ਜਾਨਾ ਕੀ ਏ ਫ਼ਰਿਸ਼ਤਾ
ਮੇਰਾ ਜਾਨ ਪਹਿਚਾਨ ਨਹੀਂ ਏ
ਤੇਰਾ ਹਰ ਇਕ ਸ਼ਿਅਰ ਤਬੱਸੁਮ
ਅੱਲ੍ਹਾ ਦਾ ਫ਼ਰਮਾਨ ਨਹੀਂ ਏ
ਹਵਾਲਾ: ਨਜ਼ਰਾਂ ਕਰਦਿਆਂ ਗੱਲਾਂ, ਸੂਫ਼ੀ ਗ਼ੁਲਾਮ ਮੁਸਤਫ਼ਾ ਤਬੱਸੁਮ ( ਹਵਾਲਾ ਵੇਖੋ )