ਉਹਦੇ ਦਰ ਤੱਕ ਰਸਾਈ ਹੋ ਗਈ ਏ
ਗ਼ਮਾਂ ਨਾਲ਼ ਆਸ਼ਨਾਈ ਹੋ ਗਈ ਏ
ਜ਼ਮਾਨੇ ਨੇ ਅਜਬ ਅੰਦਾਜ਼ ਬਦਲੇ
ਮੁਹੱਬਤ ਦੀ ਬੁਰਾਈ ਹੋ ਗਈ ਏ
ਗ਼ਰੀਬੀ ਬਣ ਗਈ ਏ ਐਬ ਅੱਜ ਕੱਲ੍ਹ
ਇਮਾਰਤ ਪਾਰਸਾਈ ਹੋ ਗਈ ਏ
ਮੇਰੇ ਅਖ਼ਲਾਸ ਦਾ ਮੁੱਲ ਪੇ ਗਿਆ ਏ
ਉਹਦੀ ਨਫ਼ਰਤ ਸਵਾਈ ਹੋ ਗਈ ਏ
ਤੂੰ ਅਪਣਾ ਜਾਣ ਕੇ ਮੈਨੂੰ ਰਵਾ ਨਾ
ਬੜੀ ਹੁਣ ਜੱਗ ਹਸਾਈ ਹੋ ਗਈ ਏ
ਗੁਆ ਬੈਠਾ ਏ ਅਪਣਾ ਆਪ ਆਦਮ
ਸ਼ਕਲ ਆਪਣੀ ਪਰਾਈ ਹੋ ਗਈ ਏ
ਵਸਲ ਦੀ ਆਰਜ਼ੂ ਕੀਤੀ ਸੀ ਸ਼ੀਦਾ
ਮੁਕੱਦਰ ਵਿਚ ਜੁਦਾਈ ਹੋ ਗਈ ਏ
ਹਵਾਲਾ: ਮੋਤੀ ਸੋਚ ਸਮੁੰਦਰ ਦੇ, ਸਫ਼ਾ 29 ( ਹਵਾਲਾ ਵੇਖੋ )
